سقطة إعلانية تصدم جماهير المونديال
رياضة
حالة من الذهول والدهشة سيطرت على الشارع الرياضي العالمي والعربي، بعد ما كشفت منصة "Ad Age" العالمية عن الكواليس السرية للإعلان الدعائي الضخم لشركة "نايكي" الخاص بكأس العالم 2026. الإعلان اللي اتعمل تحت اسم "Rip the Script" وجاء في قالب فيلم سينمائي مدته قريبة من 6 دقائق كاملة، كان المفروض يكون هو "الحدث الأبرز" لتسويق المونديال، لكنه فتح على نفسه جبهة انتقادات واسعة بسبب "سقطة" مكنش حد يتوقعها.
الغريب والمثير للجدل في التقرير، إن الشركة قررت تغير استراتيجيتها بالكامل؛ فبدل ما تعتمد على السحر الحقيقي لكرة القدم ونجوم اللعبة اللي بيهزوا الملاعب، راحت اشترت "خلطة هوليوودية".
الإعلان جمع بين الإنتاج السينمائي الضخم ومشاهير التمثيل والموسيقى، وبناء عالم افتراضي، علشان يعززوا الارتباط العاطفي مع الجمهور على حد وصفهم.
لكن السؤال اللي بيفرض نفسه هنا، وبيتداوله كل عشاق الكرة: إزاي إعلان بالحجم ده، وبالميزانية الفلكية دي، يتجاهل أساطير حفروا أسماءهم بحروف من دهب في تاريخ اللعبة؟ فين الـ "كاريزما" والتأثير الجماهيري لـ "الملك المصري" محمد صلاح، اللي يعتبر أيقونة حية للشباب في الشرق الأوسط وإفريقيا؟ وإزاي يمر إعلان للمونديال من غير ما تلمح فيه سحر الأسطورة ليونيل ميسي أو غيرهم من كبار اللعبة اللي بيحركوا مشاعر الملايين بلمسة واحدة للكورة؟
الشركة شافت إنها كده بتواكب التطور وبتعمل "فيلم طويل" ينافس شركات تانية داخلة السباق بقوة زي "تشوباني" و"باترون"، لكن الحقيقة إنها وقعت في فخ "البيزنس البارد"، وقدمت تكنولوجيا ومشاهير من بره اللعبة، ونسيت إن نبض كاس العالم الحقيقي هو النجم اللي الجماهير بتتنفس باسمه في المدرجات.
كورة القدم لعبة بتتحرك بـ 'الروح والمشاعر'، مش بـ 'حسابات المكسب والخسارة والمعادلات التسويقية الجافة'.
اللي عملته 'نايكي' في إعلانها الجديد هو أكبر دليل على إن صناع القرار في الشركات دي بقوا بعيد تماماً عن نبض الشارع الكروي.
لما تستبدل أساطير زي محمد صلاح وميسي، بنجوم من هوليوود وعوالم افتراضية، يبقى أنت مش فاهم يعني إيه شغف الجمهور العربي أو اللاتيني أو الإفريقي بلعبتهم الأولى.
البطولة دي بتعيش بأساطيرها، والجمهور مش بيدفع تمن التذكرة علشان يشوف سينما، الجمهور عاوز يشوف السحر الحقيقي في رجلينا النجوم.. وللأسف، نايكي قطعت أهم صفحة في كتاب المتعة المونديالية.
Related Stories
Elsa3h © 2025
حان وقت الإنطلاق .. نظّم بريدك الوارد بطريقة جديدة!
كن على اطلاع دائم بكل قصة واشترك في نشرتنا الإخبارية.
بالمصداقية نبني الثقة .. وبالاحترافية نرتقي بالأداء